Ujk sulmon fëmijë 5-vjeçar në oborrin e shtëpisë në Brod, Shtërpcë
Një ngjarje e rëndë ka ndodhur mbrëmjen e së mërkurës në fshatin Brod të komunës së Shtërpcës, ku një fëmijë 5-vjeçar është sulmuar nga një ujk ndërsa ndodhej në oborrin e shtëpisë.
Sipas informatave zyrtare, incidenti ka ndodhur rreth orës 19:00 në lagjen “Coklarë”. Menjëherë pas sulmit, fëmija është dërguar në qendrën emergjente në Ferizaj për trajtim të parë dhe më pas është transferuar në Prishtinë për kujdes më të specializuar mjekësor.
Policia ka njoftuar se për rastin janë informuar në orën 21:45 dhe kanë nisur hetimet për të sqaruar rrethanat e ngjarjes. Ende nuk ka detaje të sakta mbi gjendjen aktuale shëndetësore të fëmijës, por familjarët kanë bërë të ditur se ai ishte vetëm në oborr në momentin e sulmit.
Kanun Veseli, zëdhënës i policisë për rajonin e Ferizajt, konfirmoi ngjarjen:
“Me datën 27 gusht 2025, në orën 21:45, policia në Shtërpcë është informuar për një sulm që ka ndodhur në lagjen ‘Coklarë’ të fshatit Brod, ku një ujk ka sulmuar një fëmijë. Fëmija është dërguar fillimisht në qendrën emergjente në Ferizaj, e më pas në Prishtinë për trajtim më të specializuar. Sipas familjarëve, sulmi ndodhi rreth orës 19:00 kur fëmija, 5-vjeçar, ndodhej në oborrin e shtëpisë”, tha Veseli.
Policia dhe autoritetet lokale kanë intensifikuar masat për të parandaluar incidente të ngjashme dhe paralajmërojnë qytetarët që të jenë të kujdesshëm, sidomos fëmijët në zonat rurale.
